شاعر ذاکر کریمی
نه خیر اولا شیطانی گوردوم گئجه
خلقدن ایلوردی شکایت منه
گیچدوق اوتوردوق ایکیمیز کافه ده
حالتینی ایتدی حکایت منه
سویلدی شاعر سنه وار خواھیشیم
چوخ عرفائیله اولوب گردیشیم
عفو ایله بیردفعه دوشوبدور ایشیم
من یازیقام ایله حمایت منه
آخ نیه خلق ایلوری لعنت منه
*******
آدمی خلق ایتدی خدای کریم
ایلمدیم سجده من اولدوم رجیم
سوز اوزانیب ایندی اولوب بیر سیجیم
دائم ایدیر حملھ بو ملت منه
آخ نیه خلق ایلوری لعنت منه
*******
منکه بولاردان جانیم ال چکمیشم
شیطنتین بوخچاسینی بوکموشم
بیرجه کیمین بالدیزینی سی.......
بیر بله ایلولل ه اذیت منه
آخ نیه خلق ایلوری لعنت منه
*******
رشوه نی مین مین قاھاروب خان یسین
نفع ربانی حاجی ترخان یسین
تھمتینی بس نیه شیطان یسین
داغدان آغیر گلدی بو منت منه
آخ نیه خلق ایلوری لعنت منه
*******
آدمه من ایلمدیم سجده گر
واریدی صلبنده سنون تک بشر
ایندی اولوبدور ھامی بیر پارچا شر
قالدی یالاندان بو اھانت منه
آخ نیه خلق ایلوری لعنت منه
*******
اوستادی خلق ایندی تاپولماز ناشی
چیخمیا تا مکر و حیل دن باشی
ھرکس اولوبدور اوزی شیطان باشی
ھیچ ایشه ورمولل ه دخالت منه
آخ نیه خلق ایلوری لعنت منه
*******
تابع نفس اولمیسوز ای فکری خام
مین جور اویوندان چیخیسوز صبح و شام
مفته منی متھم ایلور عوام
قویمامیسوز ذره جه فرصت منه
آخ نیه خلق ایلوری لعنت منه
*******
کبلایی آرتوق آلیر اسگیک ساتور
گونده ساری یاغه نباتی قاتور
پیس پیس اوتانمور ایله قالخور یاتور
لعن ایدیر از روی حماقت منه
آخ نیه خلق ایلوری لعنت منه
*******
پیس بولوسوز گر منی ای زنجلب
آخ نه دوشوبسوز دالیما داوطلب
سیز کی تانیر سیز منی یا للعجب
بس نیه ایلورسوز اطاعت منه
آخ نیه خلق ایلوری لعنت منه
*******
من بابا پیغمبریدیم بیر زمان
طاعت ایدردی منه جان ابن جان
رتبه می آرتیردی خدای جھان
ویردی اوز عرشینده سکونت منه
آخ نیه خلق ایلوری لعنت منه
*******
گوی ده نه اجالیله اھل سما
صف چکوب ایلردی منه اقتدا
آخری بیر کلمه نین اوسته خدا
ایلدی تنبیه و سیاست منه
آخ نیه خلق ایلوری لعنت منه
*******
ایتدی تکبر منی خار و ذلیل
چیخدی الیمدن او گوزل سلسبیل
طولی چکوب سجده مین اوغلوم مین ایل
حق اوزی ورمیشدی فضیلت منه
آخ نیه خلق ایلوری لعنت منه
*******
سیز اله بد ذاتسوز ای بدخصال
آدمی خلق ایتدی حق ذوالجلال
اولدی وجودی منه وزر و وبال
اولدی اونون خلقتی نقمت منه
آخ نیه خلق ایلوری لعنت منه
*******
سجده نی من ایلمدیم آدمه
سیز ایدیسوز سجده بنی آدمه
آدیوز اسلامدی با این ھمه
سیز نه بشر سوز گنه رحمت منه
آخ نیه خلق ایلوری لعنت منه
*******
سیز ده ھله یوخدی او شان و مقام
خلقه انا الله دیورسوز ای عوام
تخت ریاستدن اوتور صبح و شام
اللشوب ایلیرسوز عداوت منه
آخ نیه خلق ایلوری لعنت منه
*******
لاپ گده بیر یول یمیسوز غیرتی
عصمتی حیثیتی شخصیتی
بیر بیره قاتدوز کیشینی عورتی
د گسین اوغول سیزدکی غیرت منه
آخ نیه خلق ایلوری لعنت منه
*******
ھاردا دیدیم من بو خانیم قیزلارا
خوش بزنه وسمه چکه فر قویا
مرثیه لرده گتوره مین ادا
بوشلادا بسدور بو لجاجت منه
آخ نیه خلق ایلوری لعنت منه
*******
آخ نه دوشوبسوز دالیما عمر و زید
ایستمیرم من بابا سیز تک مرید
آی گده لاپ سیز منی ایتدوز یزید
سیزدن اوغول چیخمادی امت منه
آخ نیه خلق ایلوری لعنت منه
*******
جامعه ده بللی دیور مسلکوز
مذھب اسلامده یوخ مدرکوز
یوز منی وطی ایلیسوز ھر تک تکوز
ایتمیسوز ھر حیلده سبقت منه
آخ نیه خلق ایلوری لعنت منه
*******
نفسیوه تنبیه ایله اوغلوم بالا
من دیورم بانقانی آل قات بالا
دوش قاباغا ھر نه گلور قارمالا
باس اوروجی ایله شماتت منه
آخ نیه خلق ایلوری لعنت منه
*******
من ھاچان ایتدیم بو قدر انقلاب
ھاردا قمار اوینادیم ایچدیم شراب
مفتضح ایتدوز منی ای بی حجاب
وردوز عجب بوللی خصارت منه
آخ نیه خلق ایلوری لعنت منه
*******
گه منه ملعون دیوسوز گه شرور
عکسیمی گه شل چکیسوز گاھی کور
گاھی گورورسوز یوخودا مثل حور
ھیچ یاراشور گور بو شباھت منه
آخ نیه خلق ایلوری لعنت منه
*******
تاپ او کریمینی سحر ای پسر
سویله بوگفتاری اونا سر بسر
منع ایله سین خلقی او نیکو پسر
ایلمسون لعن جماعت منه
آخ نیه خلق ایلوری لعنت منه
*******
بعضی صفت لر گورورم آشکار
ھیچ بیری منده یوخیدی سیزده وار
قانمامیسوز غیرت و ناموس و عار
پیس پیس ایدیر سوز ھله لعنت منه
آخ نیه خلق ایلوری لعنت منه
