تبریزدن آیرما
هر کیمدن آییرسان منی، تبریزدن آییرما
بو سئوگیلی یوردون نفسین بیزدن آییرما
اینسانه وطن، روکنی- تواندیر، دایاناق دا
آللاهینا باخ، طاقتیمی دیزدن آییرما
تبریزله عزیز اولدوم، ایزیم قالدی جاهاندا
توفانه دؤنوب گل منی بو ایزدن آییرما
چوخلار سؤزودور، شهری- بلادیر بو بلاخیز
من زادی- بلانی بو بلاخیزدن آییرما
آخسام آرازام، آخماسام آنجاق قورو باتلاق
دریا چاغیریر، گل ائوی ائوسیزدن آییرما
