بابکم من آذربایجان اوغلویام
گئـچيب جـاندان اؤز ائليـنه جـان وئره ن
بابكم من آذربـايجــان اوغلويـام
آنـا يوردا اوره كدن عئشق بسلــه يه ن
بـابكم من آذربـايجــان اوغلويـام
ايللــر بـويـو ، جـللاد بـوينـو بـورمـوشام
سينـه گـريب دوشمـه نيمـي يورموشام
ائللريميــن خـيــدمتينــده دورمـوشــام
بـابكم من آذربـايجــان اوغلويـام
بـاغلي قوللا معتصــم'دن قــورخمــاديم
اؤلوم گلدي من سؤزومدن چـيخماديم
آل قانيمي مه ير اوزه يـاخماديم
بـابكم من آذربـايجــان اوغلويـام
تـاريخيمــي آل قــانيمــلا يــازميشــام
قودوزلارا دريــن قـبير قــازميشـام
كيم دئييري من يولومو آزميشام
بابكم من آذربـايجــان اوغلويـام
هوندور داغـام سئللــر منــي ييخـمادي
دوشمنيم ده اوزومه خــور بـاخمادي
آخدي قانيم گؤز ياشلاريم آخمادي
بـابكم من آذربـايجــان اوغلويـام
سينمــده بير يـانـار اود وار سـؤنـولمـه ز
شرف يولو گئده ن يـولچو دؤنولمه ز
محببتيم ائللــريمــــــــدن اوزولمـــــه ز
بـاشـي اوجـــا آذربـايجـــان اوغلويـام
قودرتيمي اؤز ائليمدن آلميشــام
چـراغ اولـوب قــارانليقــدا يــانميشــام
ظفـر مـــارشــي وطنيمــده چالميشـام
بـابكم من آذربـايجـــان اوغلويـام
ايـران بــدن آذربـايجــان جــانيمديـــر
تـوركو ديلــي دامــارلاردا قــانيمديــر
بورا منه وطنيمــديــر شانيمــديـــر
بـابكم من آذربـايجــان اوغلويـام
بابك غيرتي- بابك ناموسو
محرم قاراداغلي
عئشقين اوركلرده، آدين ديللرده،
شؤهرتين ائللرده، جار اولدو بابك.
آزادليق بايراغين آلاركن اله،
دونيا مؤعتصمه دار اولدو بابك
اوخون نيشان آلدي اوسهلين گؤزون،
سارايلار تيتره تدي مينلر حق سؤزون.
دهشتدن ايتيردي مؤعتصم اؤزون،
عزمينله دوشمنين خار اولدو بابك.
پير بابادا چينار چاتدي دادينا،
قوينوندا يئر وئردي ائل قوچاغينا.
قارتال ايگيت، قوربان اولوم آدينا،
آدينلا حاق ديوان قورولدو بابك.
هاردا بير قوچاقدان آد آپارسالار،
اوردا گؤزوموز سني آختارار.
سؤنمز ووقارينا باش ايدي داغلار،
سنه ناموس-غئيرت، يار اولدو بابك
حمید.آرش .آزاد
آ قارداشلار؛ آرخاداشلار
قيوراق گلين ،يوبانمايين
آزجا قالير يئتيشيريک
اوتورمايين ؛دايانمايين
بو يوخوشو باشا چاتساق
گؤرونور "بابک قالاسی"
قالا دئمه؛داغ باشيندا
آليجی ترلان یوواسی
بورا بابک قالاسىدير
دوشمن بورا باتابيلمز
بو قالانين قورخوسوندان
مؤعتصملر ياتا بيلمز
بوردا ياتان ايگيتيلرين
هر بيريسی ؛بير ارسلاندير
ناکس دوشمن قارشىسيندا
هر ايگيدی بير قافلاندير
بوردا ياتان قهرمانلار
دنيزلردن باج آليبلار
خليفه لر آغلاديبلار
چوخ شاهلاردان تاج آليبلار
بو قالا مؤعتصميلری
درين قورخويا ساليبدير
اوچ يوز مين عرب قوشونو
بو يئرده عاجیز قاليبدير
بوردا منيم –سنين يوخدور
هامی اؤزون ائلدن سايير
بوردا بسله نن اينسانلار
تکجه ائل اوچون یاشيير
دوشمن هوجوم ائله ينده
هامی اله قيلينج آلير
هامی اؤلکه نی قورويوب
دوشمن جانينا اود سالير
بو يئرين توی- بايراميدير
هامىلاردا شادليق واردير
اینسانجا یاشاماق اوچون
هامىیا آزادلیق اوچون
بو قالانین قادینلاری
شانلی-شرفلی بشردیر
آزادلیقدا٬ اینسانلیقدا
کیشىلرله برابردیر
بو قالادا هر بیر قادین
امک وئرن بیر آنادیر
هر بیرى بیر کؤرپه مارال
سانکی بیر نازلی سونادیر
ساواش گونو قادینلاردا
کیشىلر تک قیلینج وورار
یاغی دوشمن قارشىسیندا
ساوالان تک مؤحکم دورار
بو قالادا یاشاییشلار
یوکسک بیر هدف اوچوندور
چالیشمالار٬ ووروشمالار
آزادلیق؛ شرف اوچوندور
بوردا اودلار دیارىدیر
هر بیر یاندا شؤهرتی وار
آزادلیغین؛ اینسانلیغین
بوردا بؤیوک حؤرمتی وار
بو قالانین سرکرده سی
ایگیت لر ایچینده تکدیر
قهرمانلار قهرمانی
شانلی-شرفلی "بابک"دیر
بو بابکدیر،"افشین" دئییل
اؤز وطنین٬ ائلین آتسین
باشچیلیقدان پولدان اؤترو
اؤزون دوشمنلره ساتسین
بو بابکدیر افشین دئییل
اورکلرده کینه اکسین
مؤعتصمه قول اولوبان
اؤز ائلینه قیلینج چکسین
بابکدیر بو،"مازیار" دئئیل
اؤلوموندن وحشت ائتسین
بئش گون یاشاماقدان اؤترو
ائلینه خیانت ائتسین
بابکدبر بو؛ مازیار دئییل
یالوارسین آلچاق دوشمنه
باغیشلانماق دیله ییبن
سجده قیلسین اهریمنه
بو بابکدیر٬ ائل اوغلودور
اؤز ائلینه آرخالانار
آزادلیق –شرف یولوندا
اؤلومو ده دیریم سانار
بابک جللاد الینده ده
قورخوب ایتیرمز اؤزونو
کسیب بیله يىنین قانین
سورتوب قیزاردار اوزونو
بابک چوخ آیدین بیلیر کی
"بابک"لریندیر گله جک
قانىنین هر داملاسیندان
مینلر بابک دیرچه له جک
بابک چوخ باخشی سئچیر کی
گئده رسه ده آدی قالار
گله جه یین "بابک"لری
بوتون اوندان ايلهام آلار
هامی آزاده اینسانلار
"بابک "اولو آتاسیدیر
"قوچ کوروغلو"٬ "قوچاق نبی"
اونون دوغما بالاسىدیر
"نیگار"٬ "هجر"٬ "زینب پاشا"
بابکین اؤز قیزلارىدیر
بونلار شرف گؤیلرىنین
سؤنمه ین اولدوزلارىدیر
آ قارداشلار؛ آرخاداشلار
قیوراق گلین؛ یوبانمایین
آزجا قالیر٬ یئتیشیریک
اوتورمایین؛ دایانمایین
